ԶԼՄ-ների դերը հանրային կառավարման համակարգում

Հատված

Ժամանակակից հասարակությունը հաճախ անվանվում է մեդիոկրատիկ, որտեղ իրական իշխանությունը պատկանում է զանգվածային լրատվության միջոցներին: Հասարակական-քաղաքական կյանքում ԶԼՄ-ների ունեցած կենտրոնական դերն այսօր, առավել քան երբևէ, անժխտելի է: Թվային տեխնոլոգիաների տարածումն ավելի է մեծացրել ինֆորմացիայի նկատմամբ պահանջարկը և սպառման շուկան: Ավելի ու ավելի շատ քաղաքացիներ են հետևում համայնքում, քաղաքում, նահանգում և երկրում տեղի ունեցող հիմնական փոփոխություններին ու զարգացումներին: Տեղեկույթի ու դրա տրամադրման ու սպառման գլոբալացումը իր հետ բերել է նաև տեսանելի և ոչ այնքան ակնհայտ իրողություններ, որոնք անհրաժեշտություն են առաջացրել պարբերաբար գնահատել այս կամ այն երկրում խոսքի և մամուլի ազատությունների ոլորտներում առկա միտումները և վայրիվերումները: ԶԼՄ-ը` որպես տնտեսական և քաղաքական իշխանության ռեսուրսների ձեռքբերման, պահպանման, ինչպես նաև բազմապատկման հիմնական միջոց, շատ արագ իրենք են դառնում գլխավոր ռեսուրսներից մեկը՝ վերափոխվելով բիզնես և քաղաքական հզոր կառույցների։ Ըստ ֆրանսիացի հայտնի հետազոտող Ռ.Դեբրեի, որն առաջարկել է «մեդիոկրատիա» տերմինը, զանգվածային լրատվամիջոցներն այսօր կատարում են այն գործառույթները, որոնք միջնադարյան Եվրոպայում պատկանել են եկեղեցուն, ընդ որում՝ հասարակության գիտակցության մեջ նախկին սրբերի տեղը գրավել են «աստղերը» և ամբոխի կուռքերը, իսկ հավատքը փոխարինվել է ԶԼՄ-ի կողմից արտահայտվող հասարակական կարծիքով։