Հատված

Բանկերի ֆինանսական վիճակը բնութագրող կարևոր ցուցանիշներից մեկն էլ բանկի կապիտալի համարժեքությունն է, առանց որի անհնար է իրականացնել բանկերի իրացվելիության և ֆինանսական կայունության փոխհարաբերությունների վերլուծություն: Եթե կապիտալը չհամապատասխանի  սահմանված չափանիշներին, բանկերը կարող են լուրջ պրոբլեմներ ունենալ, մասնավորապես հնարավոր չի լինի ապահովել իրացվելիության համապատասխան մակարդակ, կկրճատվի ակտիվային գործառնությունների ծավալը, կնվազի եկամտաբերության մակարդակը: Առևտրային բանկի կապիտալը հադես է գալիս որպես բանկի հաճախորդների  նկատմամբ պարտավորությունների կատարման ամենակարևոր երաշխիքը: Այդ պատճառով հենց կապիտալի մեծությունից և համարժեքությունից է կախված բանկի ինվեստիցիոն գործունեությունը և պարտավորությունների անխափան կատարումը: Իհարկե, առաջին հերթին բանկը ինքը պետք է հետևի իր կապիտալի ընթացիկ և ապագա վիճակին, գնահատի հնարավոր կորուստների ծածկման հնարավորությունները իր սեփական միջոցների հաշվին: Սակայն, բացի դրանից բանկային համակարգի հուսալիությունը ապահովելու համար շատ երկրների Կենտրոնական բանկեր, այլ տնտեսական նորմատիվների հետ մեկտեղ, սահմանում են նաև կապիտալի համարժեքությանը վերաբերող նորմատիվային դրույքաչափեր: