Մաքսային միության ՀՀ ինտեգրման հեռանկարները

Հատված

Մաքսային գործի կայացումն ու զարգացումը առաջ է բերել միջազգային, քաղաքական, տեխնիկական և իրավական բնույթի ռազմավարական խնդիրների համալիր լուծման, այդ թվում՝ մաքսային քաղաքականության կատարելագործման, արտաքին առևտրի սակագնային և ոչ սակագնային կարգավորման միջոցների, սկզբունքների և մեթոդների գործնական կիրառման անհրաժեշտություն: Պետության կողմից տարվող մաքսային քաղաքականությունը ներկա պայմաններում դժվար կառավարելի գործունեություն է, քանի որ արտաքին տնտեսական կապերի ընդլայնման պայմաններում զգալիորեն ավելանում է մաքսային հարաբերությունների սուբյեկտների թիվը, որոնց շարքին են դասվում արտաքին տնտեսական քաղաքականության սկզբունքներն ու նպատակները, դրանք մշակող պետությունները և այդ պետությունների ինտեգրացիոն միավորումները, գլոբալացման պայմաններում պետությունների և առանձին տարածաշրջանների մաքսային քաղաքականության վրա անմիջականորեն ազդող անդրազգային կորպորացիաները, մաքսային մարմինները, արտաքին տնտեսական գործունեություն իրականացնող առևտրային կազմակերպությունները և անհատ ձեռնարկատերերը, արտաքին տնտեսական գործունեությանը մասնակցող և մաքսային մարմինների աշխատակիցների հետ անմիջականորեն համագործակցող կազմակերպությունները: Մաքսային քաղաքականության ձևավորումը և իրացումը սերտորեն կապված են պետության համար շատ կարևոր մի շարք ներքին և արտաքին տնտեսական խնդիրների հետ, որոնց մեջ թերևս ամենակարևորներից է պետության տնտեսական անվտանգության և ինքնիշխանության ապահովումը, և կարող ենք նշել, որ արտաքին տնտեսական գործունեության ազատականացման ժամանակակից պայմաններում պետության մաքսային քաղաքականության դերը համաշխարհային տնտեսության մեջ ավելի է կարևորվում՝ երկրի տնտեսական դիրքի ամրապնդման և, միաժամանակ, ներքին անվտանգության ապահովման ու պետական բյուջեի մաքսային եկամուտների ձևավորման գործում: Այսպիսով, արտաքին առևտրի ոլորտի կարգավորման հարցում անհրաժեշտ է վարել հստակ սահմանված պետական քաղաքականություն, որը կապահովի ներքին շուկայի մատչելիությունը և վստահությունը ինչպես ներքին, այնպես էլ արտաքին ներդրողի համար՝ ապահովելով տարածաշրջանների համաչափ զարգացման սկզբունքը: