Մաքսասակագնային կարգավորման միջոցները

Հատված

Համաշխարհային տնտեսության, արտաքին տնտեսական գործունեության և արտաքին առևտրի զարգացման օրինաչափությունները միշտ էլ եղել են տնտեսագետների ուշադրության կենտրոնում, և այս կապակցությամբ առկա են բազմաթիվ տեսություններ, տեսակետներ և մոտեցումներ։ Նույնը վերաբերում է մաքսային հարաբերությունների բնագավառին։ Արտաքին տնտեսական գործունեությունը և առաջին հերթին արտաքին առևտուրը կապված են ինչպես իրավաբնական, այնպես էլ ֆիզիկական անձանց կողմից երկրի մաքսային սահմանով ապրանքների և տրանսպորտային միջոցների տեղափոխման հետ: Ընդ որում՝ ապրանքները և տրանսպորտային միջոցները ենթակա են մաքսային հսկողության և մաքսային ձևակերպման: Հայաստանի Հանրապետությունում իրականացվող միասնական մաքսային քաղաքականությունը հանդիսանում է ՀՀ տնտեսական համընդհանուր քաղաքականության անբաժանելի մասը, և դրա նպատակներից մեկը ՀՀ մաքսային սահմանով տեղափոխվող և մաքսային տարածքում արդեն տեղափոխված ապրանքների ու տրանսպորտային միջոցների մաքսային հսկողությունն է: Արտաքին տնտեսական գործունեության շնորհիվ պետությունը հնարավորություն է ունենում ձևավորել իր բյուջետային եկամուտները, ձեռք բերել անհրաժեշտ սարքավորումներ, հումք, նյութեր, առաջատար տեխնոլոգիա և այլ ապրանքներ, որոնք անհրաժեշտ են տնտեսության վերակառուցման, բնակչության կենսամակարդակի բարձրացման, ներքին արտադրության ապրանքների արտահանման, արտաքին քաղաքականության իրականացման համար՝ այն համաձայնեցնելով գործունեության այլ ուղղությունների հետ: