Փրկարար ծառայության մասին ՀՀ օրենքը անձնակազմի կառավարման տեսակետից

Հատված

Կառավաչական գործունեության յուրահատուկ տեսակը, որի օբյեկտը աշխատողների կոլեկտիվն է (անձնակազմը), ստացել է անձնակազմի կառավարում անվանումը: Որպես անձնակազմի կառավարման նպատակներ կարող ենք առանձնացնել՝ շուկայական տնտեսության պայմաններում կազմակերպության մրցունակության ապահովումը, աշխատանքի արտադրողականության և արտադրության արդյունավետության բարձրացումը, կոլեկտիվի գործունեության բարձր սոցիալական արդյունավետության ապահովումը: Նշենք, որ անձնակազմի կառավարումն ունի իր մեթոդները, որոնք բաժանվում են երեք խմբի՝ տնտեսական, կազմակերպահրամայական, սոցիալ-հոգեբանական: Անձնակազմի կառավարումը, որպես մենեջմենթի առանձին ճյուղ, ունի իր յուրահատկությունները, որոնք դրսևորվում են նրա փուլերի մեջ, որոնք հետևյալներն են՝ պլանավորում, հավաքագրում, ընտրություն, աշխատավարձի և արտոնությունների որոշում, մասնագիտական կողմնորոշում և ադապտացիա, ուսուցում, գործունեության գնահատում, ղեկավար կադրերի պատրաստում և ծառայությունում առաջխաղացման կառավարում: Անձնակազմի պլանավորման գործընթացը կազմակերպությունում իրականացվում է երեք փուլով՝ առկա ռեսուրսների գնահատում, ապագա պահանջի գնահատում, ապագա պահանջի բավարարման ծրագրերի մշակում: Հետևաբար փրկարար ծառայությունում անձնակազմի կառավարման, ինչպես նաև ծառայության առջև դրված խնդիրների արդյունավետ լուծման համար կարևոր նշանակություն ունի փրկարար ծառայության անձնակազմի պլանավորման գործընթացը: Առկա ռեսուրսների գնահատումը պլանավորման ելակետն է: Այս փուլում անհրաժեշտ է որոշել, թե յուրաքանչյուր օպերացիայի կատարման համար քանի մարդ է պահանջվում: Դրա հետ մեկտեղ անհրաժեշտ է նաև գնահատել աշխատողնեի աշխատանքի որակը: