Հատված
Մինչև 1991թ. բյուջետային համակարգի առանձին օղակների (միութենական, հանրապետական և տեղական բյուջեների) միջև եկամուտները և ծախսերը բաշխվում էին՝ ելնելով իշխանության կենտրոնական, հանրապետական և տեղական մարմինների ֆունկցիաներից, ձեռնարկությունների, տնտեսական կազմակերպությունների և հիմնարկությունների գերատեսչական ենթակայությունից և այն կարգից, որը սահմանված էր բյուջետային օրենսդրությամբ: ՀՀ բյուջեի եկամուտները ձևավորվում էին միութենական-հանրապետական և հանրապետական ենթակայության ձեռնարկությունների և տնտեսական կազմակերպությունների շրջանառության հարկի և շահույթից կատարվող մի քանի տեսակի վճարների (ֆոնդավճարի, հաստատագրված-ռենտային վճարների, շահույթի ազատ մնացորդներից մասհանումների), ինչպես նաև բյուջետային օրենսդրությամբ սահմանված ուրիշ եկամուտների հաշվին: Այդ ժամանակ հանրապետության տարածքում գտնվող միութենական ենթակայության ձեռնարկությունները և տնտեսական կազմակերպությունները իրենց շահույթից (եկամտից) վճարումներ չէին կատարում ինչպես հանրապետական, այնպես էլ տեղական բյուջեներին: